Санхүүгийн төлөвлөлт нь амьдралын таатай нөхцөл байдлыг алдагдуулахгүйгээр хүсэж байгаа зүйлээр хангахад чиглэгдэх ёстой.
Гэхдээ хүмүүс ихэвчлэн санхүүгийн үр дагаврыг нь тооцож үзэлгүйгээр худалдан авалтыг хийдэг. Иймээс зардлын төлөвлөгөөндөө санхүүгийн үүрэг хариуцлага болон амьжиргааны зардлаа нарийн зөв тодорхойлж тусгах хэрэгтэй. Олж байгаа орлогоос бага зарцуулалт нь урт хугацааны санхүүгийн зорилгоо хэрэгжүүлэх ганц арга зам болно.
Хэдийгээр хүн бүрийн хэрэглээ өөр өөр байдаг боловч зардлыг ерөнхийдөө тогтмол болон хувьсах гэсэн хоёр хэсэгт хувааж үзэх нь тохиромжтой. Сар бүр өөрчлөгддөггүй төлбөрүүдийг тогтмол зардал гэнэ. Моргейжийн болон түрээсийн төлбөр, кабель, телевиз зэрэг үйлчилгээний төлбөр зэрэг нь энэ төрлийн зардалд хамаарна. Сар бүр өөрчлөгддөг, уян хатан зардлуудыг хувьсах зардал гэнэ. Хүнс, хувцас хэрэглэлд зарцуулж байгаа мөнгө, цахилгаан, холбоо гэх мэт хэрэглээний зардлууд, эрүүл мэндийн зардал, бэлэг зэрэг нь энэ төрлийн нийтлэг зардлын жишээнд орно.
Орлого, зарлагаа тодорхойлсны үндсэн дээр тэдгээрийн хоорондын зөрүүг тооцно. Мөнгөн гүйлгээ эерэг, эсвэл сөрөг гарч болно. Хэрэв сарын турш орсон орлогоос гарсан зардлын дүн их байвал алдагдал үүснэ. Алдагдлыг хадгаламжаасаа мөнгө авах, зээл авах гэх мэт аргаар нөхөж болно. Харин орлого нь давсан үед орлогын илүүдэл үүсэх бөгөөд үүнийг хөрөнгө оруулалт, хадгаламж зэрэгт зориулж болно. Иймээс орлого болон зарлагаа хянах нь хөрөнгө оруулалт, хуримтлалын төлөвлөгөөг хэрэгжүүлэх үндэс суурь нь болж өгдөг.
